තිත්ත ඇත්ත

ඔන්න ලගදි දවසක ගෙදර ඉන්න කම්මැලිකමට උදෙම බැස්සා එලියට රස්තියාදු පාරක් වත් දානව කියල... බස් එකේ නැගලා ටවුමට ආවා... උසස් පෙල ක්ලාස් යන කෙල්ලො කොල්ලොන්ගෙන් ටවුන් එක පිරිලා... ඉස්සර අඩියක් අඩියක් ගානෙ පය ගහල තිබුන ටවුන් එකේ අමුතුම නුපුරුදු කමක් හිතට දැනුනා... අදුරන එකෙක් හොයාගන්න හතර වටේ බැලුවත් හැමතැනම තිබුනේ ජීවිතේට ඇහැ ගැටිල නැති මූණු විතරයි.

අපි ක්ලාස් යන දවස් වල නම් ටවුන් එකට බැහැපුවහම අදුරන අය ඔනේ තරම්.... දැකල පුරුදු නැති කෙල්ලෙක් කොල්ලෙක් හිටියෙ බොහොම අඩුවෙන්.... අදුරන උනුත් නැති එකේ ටිකක් වෙලා ඉදල කොහෙ හරි යනව කියල හිතන් ටවුන් එකේ එහෙ මෙහෙ යන කෙල්ලො කොල්ලො දිහා පැත්තකට වෙලා ටිකක් වෙලා බලන් හිටියා... ටික වෙලාවකින් මට අපේ සොදුරු අතීතය මතක් උනා... අපිත් මෙහෙම හිටියා නේද කියල....

සාමන්‍ය පෙල ඉවර වෙලා අපි උසස් පෙල කරන්න ආපු හැටි... අවුරුදු 2,3ක් මේ ටවුමෙම ජීවිතේ වැඩි කොටසක් ගෙවුන හැටි... ඒ කාලේ තිබුන සුන්දරත්වය! ඒ කිසිම දෙයක් අද නෑ... ඉතුරු වෙලා තියෙන්නේ ඒ දෙවල් වල මතකයන් විතරයි... එක වෙලාවකට හිතෙනවා ජීවිතේ ගතකරපු හොඳම කාලෙ නේද ඒ කියල...

ක්ලාස් වල නටපු පිස්සු... සෙට් එකත් එක්ක ක්ලාස් කට් කරලා රවුම් ගහපු හැටි.... කෙල්ලො ටොක් කරන්න කරපු වැඩ... වලි දාගෙන ගහගත්ත ඒවා.... පොලිසියෙන් බේරෙන්න දුවපු ඒවා... මතක් වෙනකොටත් හිනා යනවා. ඔවා ඒ කාලේ කරන්නේ නැතුව නාකි උනාම කරන්නද? ක්ලාස් කට් කරන්න ක්ලාස් යන්න ඔනනේ.



ටවුන් එකේ හිටපු සමහර උන් ක්ලාස් වලට දුවනවා. සෙට් බහින උන් අනිත් එවුන් එනකම් ඉන්නවා.. ඒ අතරෙ සමහර තැන් වල කෙල්ලො ෆොන් එක අතේ තියන කොට කොට කොල්ලා එනකම් බලන් ඉන්නවා... කොල්ලො කෙල්ලෝ එනකම් බලන් ඉන්නවා.... සමහර උන් වල බහින්න තැන් ගැන බරට සාකච්ඡා. කපල් තැන් තැන් වලට වෙලා කතා කර කර ඉන්නවා අද  ක්ලාස් යනවද නැත්තම් කොහෙ හරි රවුමක් දානවද කියලා....

මේ කාලේ ජීවිතෙ හරිම සැහැල්ලුයි... වගකීම්, යුතුකම් වගේ දේවල් ගැන කිසිම තේරුමක් නෑ. ඒ නිසා පුලුවන් හැම වෙලේම ජීවිතේ උපරිමෙන් විදින්න තමයි ගොඩක් දෙනා උත්සාහ කරන්නේ. අනාගතේ ගැන හීන මැවුවට යතාර්තය ගැන කිසිම අවබොදයක් නැ.... හැම එකාගෙම මුණු වල තියෙන්නේ හිනාවල්... ඒත් ඔය හිනාව හැමදාම තියෙයි ද? මුන් දිහා බලන් හිටියම අපිට මුන් ගැන දුක හිතෙනවා... අනාගතේ මුන්ටත් වෙන්නෙ අපිට උන දේම නේද කියල....


අපි දුක් වෙනවා ඒ කාලේ හරියට වැඩ කලානම් දැන් ගොඩ නේද කියල... ඔය හැම දෙම පවතින්නේ විභාගෙ ඉවර වෙනකම් විතරයිනෙ... ඊට පස්සෙ තමන්ට තමන් විතරයි... ලග හිටපු යාලුවොත් නෑ සමහර විට ලග හිටපු කෙල්ලත් නෑ....

මුන්ට මේ දේවල් තෙරුම් කරල දීලත් වැඩක් නැ... එහෙම කලාම මුන් හිතන්නේ අපිට පිස්සු කියලා. ( අපිටත් ඒ කාලේ හිතුනේ එහෙමනේ ) ඇත්තටම වයසෙ වැරැද්ද කියලයි මටනම් හිතුනේ...

කඩේක දාල තිබුන රේඩියො ඒකේ සිංදුවක් යනවා ඇහුනා,


           සිරිපොද වැස්සේ එකම කුඩේ යට
           තෙරපි තෙරපි අර යුවලක් යන හැඩ
           මටත් එසේ ගිය හැටි මතකයි
           මට හොඳ හැටි මතකයි..........


ඒ සිංදුවේ හඩත් එක්කම මමත් යාලුවෙක් ගෙ ගෙදර යන්න බස් එකකට නැග්ගා....